La biblioteca critica d'A Melonera, naxe con a intención d'estar un espacio de difusión de pensamiento y do meter amán de traza accesible libros, fanzins y revistas que no son fácils de trobar en espacios institucionals. Un puesto do se pueda producir o debat, l'analisi y ra reflexión.
Aquí trobarás libros y textos criticos, transformadors y revolucionarios. Editatos en a suya mayoría per colectivos y editorials alternativas, que abarcan, dende una perspectiva critica, temas como ra ecolochía, pensamiento antiautoritario, economía, feminismo, migracions, pedagochía, cuentracultura, historia, salut… Libros que de feto, creyemos necesario que sían leyitos, pensatos y debatitos per o nuestro entorno mas cercano. Queremos dar-los a conoxer y per ixo fomentaremos grupos de lectura, aculliremos charras y presentacions.
Amás, queremos funcionar tamién como librería. Beluns de ros libros que son en a biblioteca, son tamién disponibles pa ra venda. Es beneficios de ra librería van integrament a cubrir es gastos de ro prochecto y mantener ro CSA A Melonera. Garra de ras personas que colaboramos con o suyo mantenimiento cobramos per o treballo que desenvolvemos.
Tiens bel libro que encaxe dentro de ras nuestras valors y fins y quiers donar-lo a A Melonera? Mete-te-bi en contacto con nusatres que seremos encantates de recibir-lo.¿U prefieres ceder-lo?Puez amprar-lo temporalment pa ro suyo uso en a biblioteca y si en bel momento deseyas recuperar-lo puez comunicar-nos-lo y venir a per él.
Te fería goyo que en a biblioteca b’hese bel libro que no trobas? Comenta-nos-lo pa vier si lo podemos aconseguir.
Funcionamiento
Funcionamiento de ra Biblioteca Critica
– Puez leyer es libros, revistas y fanzins de ra biblioteca en A Melonera u levar-te-los ta casa.
– Pa acceder a l’ampra de libros ye necesario que sías socia d'A Melonera y tiengamos es tuyos datos.
Te puez levar máximo dos libros durant 3 semanas, renovables una vegata per 7 días mas.
– Como se trata d'una biblioteca chicota hemos optato per limitar o tiempo y cantidat d'exemplars que te puez levar, pa asegurar-nos que ros libros se mantienen en movimiento.
Funcionamiento de ra Distri/Librería
– Cualsequier persona puede acceder a ra compra de libros, siempre que sían disponibles en modalidat de compra y b’haiga stock.
– Si yes socia d'A Melonera, puez beneficiar-te d'un 5% de desconto.
– Y si amás participas activament en un Grupo de Treballo no tot va a estar currar! Tendrás un 15% de desconto en es libros.
– Si dimpués de leyer un libro, creyes que se va a quedar aparcato en un cancel, puez donar-lo a A Melonera pa que le podamos dar una segunda vida.
– Es beneficios de ra venda de libros irán destinatos ta financiar o prochecto, emparar o financiamiento d'A Melonera y obtener mas libros. Garra de ras personas que colaboramos con o suyo mantenimiento cobramos per o treballo que desenvolvemos.
ARA 
CAST